2022 жылғы 5 мамырда Алматы облысы Ақсу ауданы І. Жансүгіров ауылында жалпы орта білім беретін мектеп оқушылары арасында республикалық «Ілияс оқулары» өткізілді.
Байқаудың негізгі мақсаты: оқушылардың поэзияға деген құштарлығын арттыру, өлең сөзінің құдіретін жанымен сезініп, жүрегімен түсіне білуге үйрету, жас ақындарға әлеуметтік рухани қолдау көрсету, олармен шығармашылық жұмыс түрлерін жандандыру.
Республикалық байқаудың «Ілияс – эпик ақын», «Сұлу сөздің сүлейі» және «Ағынды менің-Ақсуым» бағыттарында 46 оқушы бақ сынасты.
Павлодар облысынан байқауға өңірлік кезеңінің 3 жеңімпазы қатысты.
Байқау қорытындысы бойынша «Сұлу сөздің сүлейі» бағытында І дәрежелі дипломға Баянауыл ауданы Ж.Аймауытов ат. жалпы орта білім беру мектебінің 11-сынып оқушысы Шәкен Айсәуле ие болды.
Ақсу қаласы Қызылжар жалпы орта білім беру мектебінің 8-сынып оқушысы Темиргалиева Аяулым және Ы. Алтынсарин ат. дарынды балаларға арналған облыстық қазақ гимназия-интернатының 9-сынып оқушысы Рафаилов Бейбарыс «Жас жыршы» номинациясын иеленді.
Іс-шара аясында қатысушылар мұражайға барып, Ілияс Жансүгіров ескерткішіне гүл шоқтарын қойды.
«Ертіс дарыны» өңірлік қосымша білім беру
оқу-әдістемелік орталығының бөлім меңгерушісі
Ж.Абаильдинова
