Маңғыстау облысының білім басқармасы 2024 жылғы 28-30 қараша күндері жазушы Әбіш Кекілбаевтің шығармашылығына арналған республикалық конкурс өткізді.
Байқау төрт бағыт бойынша өтті: Ә. Кекілбаевтің шығармаларын мәнерлеп жатқа оқу; «Құс қанаты» және «Ең бақытты күн» әңгімелеріне иллюстрация салу; жазушының шығармашылығы бойынша зерделеу жоба жазу; бір шығармасына сахналық қойылым көрсету.
Шара аясында қаламгердің туған жері Онды ауылына саяхат ұйымдастырылды. Әбіш Кекілбаев атындағы мектепте команда жетекшілері мен ұстаздарға «Әбіштің әмбебап әлемі» атты семинар өткізілді.
Павлодар облысынан республикалық додаға өңірлік байқаудың жеңімпаздары қатысты: дарынды балаларға арналған музыкалық мектеп-интернатының 9-сынып оқушысы Хван Лиана; Ы. Алтынсарин атындағы дарынды балаларға арналған облыстық қазақ гимназия-интернатының 11-сынып оқушысы Жұмабай Қосман; Успен ауданы Қаратай ЖОББМ 8-сынып оқушысы Смағұл Мәдияр; дарынды балаларға арналған Абай атындағы гимназиясының оқушылары Нығметулла Ерасыл, Күмісбек Медина, Амантаева Жансая, Қамит Аружан.
Республикалық шара қорытындысында Жұмабай Қосман «Мәнерлеп оқу» бағыттарында ІІ дәрежелі дипломмен марапатталды.
«Ертіс дарыны» өңірлік қосымша білім беру
оқу-әдістемелік орталығы
